Artxiboa gaika: Tebak idatzia

Olozko ogia – Haferbrot

Azpalditik olo ogia masa madrearekin egiteko grina neukan. Oloa gustokoa dut, zaporea suabe izateaz gain zuntza disolbagarria ere duelako (irin integrala edo kopoak janda, batez ere), eta gaur egungo elikaduran zuntza kantitate gutxi jaten dela kontutan izanda, idorreria sor ez dadin oso lagungarria izan daitekelako.

Astelehenean bertan hasten naiz pentsatzen asteburuan zein ogi egingo dudan, eta errituala bihurtu da. Lehenengo zerealak aukeratu, eta astean zehar nire liburuetan eta weborrialdetan begiratzen dut ea gustoko errezeta topatzen dudan. Pasa den astean ia astirik gabe geratu nintzen, ostirala iritsita, gustoko errezetarik ez bainuen aukeratua. Xabik Alemaniatik ekarritako olo aleak erabiliko nituela erabakita neukan, baina gustoko ogi errezeta aurkitzea ez nuen lortzen. Bai liburuetan bai weborrialdeetan, errezeta gehienak nire ustez, olo kopo edota irin integral gutxi zeuzkaten. Goxoak ziruditen pare bat aurkitu nituen, Gastronomía y Cía eta “mis recetas favoritas”-eko loturak uzten dizkizuet, masa madre ez izan edota erabili nahi ezean edonork olo ogia egiteko aukera izan dezan.

Ostiralean 22:00tan, ondino ez nekien zein ogi egingo nuen, baina jadanik badaezpada, zekale ama orea martxan neukan.

Azkenean olo ogia (Haferbrot, alemanieraz) aurkitu nuen. Olo irinaren ordez kopoak zeuzkan, baina halan da guztiz “ogia horixe zela” erabaki nuen. Pare bat aldaketa, irina eta ama orea erabili ahal izateko eta listo!!. Hona, errezeta dakarkizuet.



OSAGAIAK (740 gramoko hiru ogi egiteko)

  • 216 g zekale ama orea: 3 g zekale ama orea (aktibatua), 120 g zekale integrala eta 96 g ur (beherago, zelan egiten den idatzi dizuet).
  • De http://www.alnature.de
  • 530 g “olo irin beratze”: 250 g olo irin integrala (edo olo kopoak) eta 280 g ur beroa (2-4 ordu lehenago prestatua).
  • 800 g galirin zuria (Rincón del Segura)
  • 80 g zekale irin integrala
  • 22 g gatza
  • 10 g azukrea
  • 10 g landare margarina
  • 525 g ura (gutxi gora behera, gitxiago ala gehiago izan daiteke)
  • (Aukerako) 15 g irin malteatua (J. Renobell -Bartzelona- dendatik ekarritakoa)
  • (Aukerako) Ogia egiteko, Alemaniatik ekarritako espezia nahasketa (Brot Gewürz Alnatura markakoa). Osagaiak: Txarpoila (Kümmel), mihilua (Fenchel), martorria (Koriander) eta anis-belarra (Anis).

Izaskunek, espezia nahasketa errezeta hau eskuratu zidan. Hementxe duzue:

2 goilakarada martorri haziak
1          ”       txarpoil
1 goilakaradatxo anisa
1          ”            kuminoa
1          ”            mihilua
Osagai guztiak birrindu eta pote baten gorde gure zekale ogiei botatzeko.


EGITEKO MODUA
  1. 12-15 ordu lehenago zekale ama orea prestatu egin behar da. Bezperatik zekale ama orea aktibatua izango dugu eta honetatik 3 gramo besterik ez ditugu hartuko. Ura botako diogu, ondo nahastu eta segituan zekale irin integrala, berriro nahastu. Nik normalean arratsaldeko 7tan prestatzen dut hurrengo goizean 11ak aldera ogia egiteko.
  2. 2-4 ordu lehenago “olo irin beratze” hori prestatzen da. Bol baten olo irin integrala ipiniko dugu eta kolpe batean ur bero-beroa botako diogu. Egurrezko goilara batekin ondo irabiatu. Plastikoaz estali eta esan bezala, 2-4 ordu beratzen utziko dugu.
  3. Ogia egiten den egunean, bol haundi baten osagai guztiak, ura izan ezik, jarriko ditugu. Ura pixkanaka pixkanaka gehituko diegu. Eskua orean sartzea gomendatzen dizuet, orea hatzamarrekin marruskatuz.  Orea itzaskorra eta irristakorra da, ia kontrolaezina. Behin nahastuta, bol-a estalita, 30 minutuko atsedenaldia hartzen utziko dugu.
  4. Orea azalera atera eta frantses teknika erabiliz (oso itsaskorra denez tradizional erara zaila delako), 10-15 minutu oratuko dugu.
  5. Bol-a olioaz igurtzi eta orea barruan sartu 3 orduko lehenengo hartzidura egin dezan. Olioz igurtzitako azaleran, ordubetero tolesdura bat emanez.
  6. Azken tolesdura egin eta gero, irin pittin bat botako dugu azaleran eta horren gainean 15 minutu inguru orea deskantsatzen utziko dugu. 740 gramoko hiru zatitan banandu, boleatu eta azkenik, erabiliko ditugun moldeetako forma eman (borobila ala luzea).
  7. (Aukerako) orea trapu busti batetik pasatu, hezetu eta haziak gainetik bota.
  8. Banetoietan edota olioz igurtzitako metalezko moldeetan sartu eta bigarren hartzidura egin dezatela, beste pare bat ordu utziko ditugu.
  9. Laba berotu 240ºtara. Lurrina prestatuko dugu labaren barruan (harrira eta metalezko ontzira ur beroa jaurtikiz)
  10. Ogiari ebakiak egin eta laban sartu. 5 minutu pasa eta gero tenperatura 220ºtara jaitsi. Labekatzeko denbora: 50 minutu.

ON EGIN DEZAZUELA!!

Advertisements

6 Iruzkin

Tebak idatzia atalean

Sagarrezko neguko ogia – Dan Leparden “winter apple loaf”

Bai,
Badakit!

Neguko ogia dela eta udan gaudela. Baietz.

Baina, egoeragatik errezeta hau eta ez besterik bilatu behar izan dut. Xabierren errua da, berak Ingalaterratik ekarritako irina oparitu zidalako. Irin honek oso izen luzea eta berezia du: “Organic stoneground malted blend flour” “Bacheldre Watermill markakoa” eta britainiarra da. Euskarara itzulita “harrizko errotan birrinduriko irin malteatu ekologikoa” eta olé. Horregatik, liburutegi haundia den internetera abiatu naiz irin berezi hau erabiltzen duen errezeta baten bila. Jatorrizko errezeta esteka honetan.

OSAGAIAK

  • Sagar txikia (golden motakoa alegia)
  • Tipula txikia
  • 75 ml. garagardo edo sagardo (errezeta britainiarra izanda, ez dut uste gure sagardo garratzaren antzekorik erabiliko dutenik. Eurek, Erresuma Batuan “El Gaitero” sagardoaren antzekoa edaten baitute)
  • Jatorrizko errezetan 100 ml. ur erabiltzen dituzte baina nik ez nituen behar izan. Lehenengo saiakeran ogi hau egin nuenean ur kopuru guztia batera bota nion. Hasiberriaren akatsa da. Ez dugu ur kopuru guztia batera botako, pixkanaka-pixkanaka baizik, orearen hezetasunaren arabera.
  • 200 g. ama orea (100 g. ur + 100 g. galirin zuria)
  • 75 g. ekilore haziak
  • 75 g. kuia (kalabaza) haziak
  • 250 g. irin malteatua. Irin berezia da,  Xabierrek oparitutakoa. Esteka honetan, Dan Lepardek irin berezi honen ordez zer erabil daiteken aipatzen du: 150 g. galirin zuria, 100g. galirin osokoa, 3  koilarakada olo-kopo (edo gari-kopo, garagar-kopo) erreak eta koilarakada bat hurrengo hiru aukera hauetatik: malta-estraktua (líkidoa edo lehortua); xirope iluna (erremolatxazkoa alegia) edota melaza.
  • 175 g. galirin zuria (Rincón del Segura alegia)
  • 10 g. gatz
  • Oratzeko, oliba olioa

ZELAN EGITEN DEN

  1. Bol baten sagarra azalarekin birrindua ipini (haziak kenduta). Tipula gordinik txiki-txiki zatituta bota. Garagardoa (edo sagardoa), ama orea, haziak, irinak eta gatza gehitu. Azkenik eta BEHAR IZANEZ GERO, ura pixkanaka-pixkanaka gehitu. Ez egin, nik lehenengo saiakeran egin nuen moduan. Ez ahaztu ere, tipula eta sagarrak ura botatzen dutela. Oso ondo nahastu eta 30 minutu egonean laga. Orea biguna izan arren arazo haundirik gabe oratu daiteke. Bola forma eman eta olioztatutako bol baten utzi. Film gardenaz edo zapiaz estali.
  2. Hartzidura egiteko sukaldean bi ordu eta erdi utzi dut (gaur, 25º C inguru zeunden). 40-45 minututik minutura tolesdura eman diot.
  3. Hirugarren tolesdura ondoren orea, oratzeko azaleran lasai-lasai 5 minutu utziko dugu. Geroago, forma eman. Orea oso itsaskorra denez, saskian edo banetoian irina emankortasunez bota eta bertan sartu. Estali, eta ordu eta erdi inguru utziko dugu.
  4. Laba 220º-tara berotu.
  5. Orea atara eta laban sartu baino lehen ebagiak egingo dizkiogu. Labako beheko partean ura bota (nik jada ez dut ontzirik ipintzen, zuzenean botatzen diot lurrina egiteko). 220º-tara 20 minutuz labekatu ondoren, 180º-tara jeitsi eta beste 20 minutu eduki. Oso huzain ederra botatzen du.

Egun bat pasa ondoren dastatu dugu eta izugarrizko zaporea du. Izokina ketan, hegaluze ketan, gazta ketan dastatuak izan ditut baina, ogia ketan inoiz dastatu barik neukan!!!  Izokina ketan, ogi honen gainean, ahaztezinezko esperientzia da.

Sarrera hau, Xabierri eta Juantxori eskeini nahi diet. Xabierri Alemaniatik errekadutxoak ekarri baitizkidalako eta Juantxori bere pazientziagatik, Aitzorrotz-etik jeisterakoan farregura eman zidan eta bera izan zen nere txantxetako “biktima”. Mila esker bioi  bihotz-bihotzez.

4 Iruzkin

Tebak idatzia atalean

Iragarritako bisitaldi baten kronika

Udaberriko egun ederra

pasa genuen elkar,

Saturio okina eta Olatzegaz,

arto ogiaren atzetik

bederatzi ezezagun,

bazkarian bederatzi lagun

ontziak topa.

Ortzadar-ek idatzia.  Milesker gure blogean zure olerkiarekin partehartzeagatik.


Jo-muga: “Tahona Bikiak” okindegia (Gizaburuaga, Bizkaia).

Ekainaren 13a, goizeko hamarrak, larunbata. Hauxe zen Saturio Hornillosen okindegira bisitaldia egiteko erdi ezagun ziren 9 forozalek adostu eta “Ogiaren foroan” iragarritako data.

Bisitaldi aurretik, Zornotzan (Amorebieta) gosari bat programatua genuen indarrak hartzeko “Hogan´s” tabernan, non, bat edo beste, “pintxo-jale” amorratutzat azaldu zen, azkenean, hainbesterako izan ez bazan ere. Une lasaiak jarraitu zuten lehenbiziko urduritasunak gaindituta, hasiera baten, taldekide batzuk ez bait ziren ezagutzen, gutxi batzuk ezagunak ginen arren. Sendiaren bilera handi baten zaudenean bezala lehengusu ezezagun batzuk aurkezterakoan. Bi autotan Gizaburuagarantz abiatu ginen.

Bizkaian, Gizaburuagan, Okamika poligono industrialean dagoen “Tahona Bikiak” okindegira iritsi ginen. Han zegoen zain Saturio jauna, pozik eta zoriontsu, taldeari ongi etorria emateko prest. Han geunden gu; argazki kamara erne eta koadernoa eskuetan, xehetasun nimiñoenak ere jasotzeko prest.

Ogia eta okindegi profesional errealitatea guztiz arrotz zutenentzat, lehen harreman, sakontze eta osatze bat izan zen; dena batera. Saturiok, bere egunerokotasunean egiten dituen pauso guztien berri eman zigun argi, sinple eta garbi. Osagaien hautaketa eta zainketatik okindegiko  I + D-ra (Ikerketa eta Desarrolloa). Pauso guztiak igaro genituen, Saturiori nahi hainbat galdera luzatzen, atsegintasunez erantzuten zizkigularik.

Laburbilduz, ogia egitearen prozesuan nik ondorengoa azpimarratuko nuke:

Osagaietatik:

–         Berak hozkailuan (4º C) gatz eta guzti gordetzen duen ama orea.  Egunean zehar beste hainbeste ogirentzat aurre-hartzidurak ezberdinak prestatzen dituztela aipatu zigun

ama orea

Irinak: galirin sakuak

  • Artoirina: zapore izugarria ematen duten 3 irin mota ezberdin. Artoa naturala da, ez transgenikoa, Mexikotik dakarte baina Euskal Herrian ehotzen da.
  • Galirina: Harinera Harivasa eta Monkayoko Harineratik ekarritako irinak ikusi genituen.  Segun eta ze ogi egiteko indarrezko eta indar handiko irinak erabiltzen dituzte. Ez da falta, betiko Zamorako irina. Oso ona dela ziurtatzen du.
  • Zekale irina: bertako zekaleak eta Alemaniatik ekarritakoak erabiltzen dituzte.

Maltak:

  • 3 malta mota erabiltzen dituzte. Bat, txuria eta gozoa,  bestea, apur bat xigortua eta (Ricoré)  atxikoriaren antzerako zapore aduena eta hurugarren bat, iluna eta kafearen zaporea gogorarazten duena. Beraiek, malta suabeak erabiltzen dituzte azala finagoa izan dadin.  Malta, osagai profesional bat da eta zorroetan saltzen da (Ikus argazkia).

Saltsak:

Prozesuan

–         Ogia egiterakoan erabilitako ura zikinkeriak kentzeko iragazitakoa da eta hozbero eta ur kopuru jakin bat dariola iristen da.

–         Bi abiadurako oratzaileak. Hiru hartzen ipuinean bezalako 3 oratzaile: txikia, ertaina eta handia.

beso oratzeko gailua

–         Forma eman eta boleatu, eskuz egiten dute.

–         Hartzidurarako, oreak 28-29º C tan mantentzen dituzten gurpildun altzariak (ikus argazkia). Ogiak oihal sendoetan pausatzen dira altzarietako apaletan. Hartzidura epea irinaren indarraren araberakoa da. ( indartsuagoa irina, epe luzeagoa).

hartzidurako armairua
–         Egurrez dabilen labe jiragarria: Argi dago Saturiorentzat  unerik atseginenetarikoa dela: hemen luzez egon ginen. Nola instalatu zuten eskuz zatiz-zati eta nola dagoen lotua sistema pendular batez adierazi zigun.  Labearen zorua osatzen duen adreilu errekaitz  mihiztatua ere erakutsi zigun (ikus argazkia); egurra pagoarena, .e.a.  Labeak 200º C tako hozberoa mantentzen du, itzalita dagoenean ere.  Labaldia sartzen dutenean, hozberoa 190º C tara jeisten da.  Orduantxe da egosketa egokia ematen den garaia. Saturiok dioenez, tenperatura irakurketa ez da erreala, “labearen indarra” 190º C takoa baino handiagoa baita. 100 kg ore egosi daitezke labaldi baten (50kg irineri dagokiona). Labaldiaren iraupena aldakorra da inguruko hezetasunak eragin zuzena baitu beregan.

laba ta pala

–         Ogia egiterakoan  aurkitutako zailtasunak: Gizaburuaga, mendiarteko aran batean kokatzen da eta laberatze lanak zailtzen dituen mikroklima oso heze berezi bat du. Honek, hezetasun erlatiboaz gain, beherantz presioa sortzen du, labearen tximini tiroaren gorantzako irteera oztopatuz, atmosferaren bi indarren norgehiagoka bailitzan. Hezetasun erlatibo honek, ogiaren elaborazioan eta ondorengo iraupenean ere eragin zuzena du. Beraiek,  tenperatura baxuiagoan egosiz  erantzun diote arazoari, eta azkeneko 10-15 minutuetan tximinia-tiroa irekita utziz.

–         Azken ekoizpena: ogiak ebaki eta dastatzekoz ai genituen. Artogia, zekale ogia, integrala eta txuria. Ez nuke jakingo zein izan nuen gustukoen; den denak sekulakoak iruditu zitzaizkidan.

Lekitton (Lekeitio) pintxo batzuk jatera joan ginen Saturio eta bere alaba Olatzekin ( bikietariko bat), hau,  ibilalditxoko gure gidaria izan zen bazkal aurretik. Birritan esan gabe onartu zuten gure taldearekin bazkaltzeko gonbitea. Bazkal ondoren Saturio loak jota bazegoen ere, erretiratzeko ordua iritsi arte iraun zuen; larunbat gaueko ekitaldia aurretik atseden apur bat behar zuen.

Denontzat oso atsegina izan zenaren susmoa dut. Badakigu, Saturiori ere, oroigarri atsegina geratu zitzaiola.

Dasta dezazuen, arto bizkotxoaren errezetaren osagaiak eskaintzen dizkizuet; Saturioren oparia.

  • Arto irina     kilo  1
  • 24 arraultza
  • Azukrea   kilo  1
  • Olibazko olioa  500 ml
  • Ekilore olia  500 ml

Lehenbizi, arraultzak eta azukrea irabiatu ondo ondo asko jaso arte eta ondoren, apurka-apurka olioa (ekilore eta olibazkoa) gehitzen joan. Azkenik, artirina gehitu. Ondo nahasi, moldeetan sartu aurrez olioz ondo igurtziak. Labea 180º C tara eta eginda egon arte ( labea eta kopuruaren arabera) hots,  zotz edo orratz batez ziztatu ondoren garbi irteten denean.

Oharra: Argazkiak, Marilurenak:  (http://www.flickr.com/photos/marilupez/sets/72157624142210863/)

eta Fougasserenak: (http://s784.photobucket.com/albums/yy121/1fougasse/) dira.

La Tahona bisitatzen izan ginen guztion izenean, Saturio eta Olatzi dedikatzea gustatuko litzaidake.

5 Iruzkin

Tebak idatzia atalean

Arto eta ekilore hazidun ogia

“El folló”  landetxeko bideoa ikusten sortu zen ogi honen ideia.  Iban Yarza aurreratu zuenez, landetxe hori izango da , datorren uztailean “ogiaren 2. festaren”  gunea
Bideoa ikustean, bukaera antzean, ogi batzuk aurkezten dituzte eta beraien artean, arto eta pipadun ogia aipatu zuten. Tate! Pipak eta artoa!  Eta, nire haurtzaroko asteburuak etorri zitzaizkidan burura eta arto erreak “pepes” jaten genituen eta pipak ere bai, noizbehinka. Zapore nahasketak ona izan behar du, pentsatu nuen, eta arto-ogiaren errezeta bila abiatu nintzen.  Liburuetan begiratu nuen, Interneten… Ez nuen %100 ase ninduen bat bera ere aurkitu, eta gainera, ogia  ama oreaz egitea nahi nuen. Beraz, inprobisatzeari eman nion.

OSAGAIAK, ia kiloko ogi bi egiteko.

  • Arto irin ekologikoa 380gr.
  • Ogia egiteko galirin ekologikoa (Rincón del Segura) 570gr.
  • Galirin zuriaren ama orea 400gr.
  • Gatza 20gr.
  • Ekilore pipak gezak eta gordinik 160gr.
  • Ura 700gr. gutxi gora behera (arto-irinak ur asko xurrupatzen baitu)

ELABORAZIOA

  1. Arto-irina beratzea: ogia egiten hasi baino ordu bete aurretik, bol baten, 600 g irakindako ura arto-irinari ezartzen diogu.Ondo nahasi eta  estalita egonean uzten dugu.
  2. Beste bol baten, ogia egiteko galirina eta gatza pisatu eta ongi nahasten  ditugu.   Ama orea gehitu eta beste 100 bat g. ura. Nahastu. Ez da irin guztia bat egingo.
  3. Arto irin beratua gehitu. Ongi nahasi.  Orain bai, irin guztiak bat egingo duela.  Ore bigun eta heze bat geratzen da.
  4. Oratzeko, frantziar oraketa erabiliko dugu, pazientzia handiz, lasai eta emeki oratuz. Denboratxoa eramango digu ore fin eta leun bat lortu arte. Pazientzia eta musika atsegina.
  5. Gehiena oratuta dugunean,  apur bat lautu eta pipa guztiak gainetik ezartzen dizkiogu, orea itxi eta oratzen jarraitzen dugu beste tartetxo bat.
  6. Orea bitan zatitu, olioz igurtzitako bi boletan sartu eta toki epel batean uzten dugu 3 bat ordu, orduro tolesdura bat emanez oreari. Tolesdurak, olioztatutako sukalde gainan eman eman nizkien.
  7. Hirugarren  tolestearen ondoren, oreei forma eman eta saskitxoetan edo banetoietan sartuko dugu
  8. Bigarren fermentazio bat egin dezan ordu eta erdi bat uzten dugu.
  9. Labea berotu 220ºtara eta lurruna izan dezan prestatzen dugu: labearen behekaldean matalezko ontzi bat, mikroondasen ura berotzen eta lurruntzeko spray  bat.
  10. Banetoietatik,  labarako paper batera ateratzen ditugu oreak eta taxuak gauzatzen dizkiogu. Laban sartu. Metalezko  ontzian ur irakina botatzen dugu eta sprayaz labaren hormak lurrintzen ditugu. 60 minutu, 220º labekatu. Hozten uzten dugu.

Hona hemen emaitza:  arto-irina bezalako gluten gabeko irin mordoxka izan arren,  pilo bat igo diren ogiak, Rincón de Segurako irina indar  irin bezala kontsideratzen ez den arren.

Gaur, lan saio batera eraman dut ogi bat eta apur bat astuna dela azaldu didate, ogi mamia trinkoa delako baina, oso gozoa dela. Hona hemen ogi mamiaren argazki bat.

On egin!!!

4 Iruzkin

Tebak idatzia atalean

Malta ogi baltza – Malzbrot

Ogiaren foroaren kortesiaz eskainitako errezeta. Foro kide batek ogi beltz alemana nola egin zitekeen galdetzen zuen eta Dieterrek 4 errezeta idatzi zituen nahi duen orok jaso ditzan.
Hauxe da lauetatik lehenbizikoa: hasi berrientzat maltazko ogi beltza. Pazientzia apur bat eta egiteko pare bat egun badituzue zotina kentzeko adinako ogia da.

Ogi honek,  dietetika edota ekologi produktuen dendetan aurki daitezkeen osagai batzuk behar ditu: malta edaria (argazkian “Power Malt”) eta malta siropea  (xarabea) (Malto di orzo”).  Malta edaria oso- oso  gozoa da eta siropea, are gehiago.
OSAGAIAK  kiloko 2 ogi egiteko

Zekale ama orea. 15-20 ordu aurretik prestatu eta 28º C tan utzi.

  • 70  g zekale ama orea aktiboa (abiapuntu).
  • 250 g zekale irin latz / oso integrala. TMX, sukaldeko errobota edo ehogailuan zekale alea birrinduz lor dezakezue.
  • 100 g  zekale irin integrala.
  • 350 g ura.

Quellstück (aldez aurreko  beratzea). Bezpera gauean nahastu:

  • 550 g zekale irin latz / oso integrala.
  • 100 g gari irin integrala.
  • 300 g malta edaria (Vitamalt, Pony, e.a).  “Eroski”  bezalako dendetan erosgai…
  • 270 g ura.
  • 50 g maltazko siropea ( xarabea)

NegritaAzken orea:

  • aldez aurretiko beratzea.
  • 700 g zekale ama orea.
  • 20 g gatza.
  • 10 g  azukrea.
  • Aukeran:  15 g legami freskoa.

LANKETA:

  1. Abiatzeko zekale ama orea prest izan behar da.  Ama orea prestatu, 15-20 ordu 28º tan edo leku epel baten utzi. Nirea 19 ordu egon da.
  2. Bezpera gauean aldez aurretik beratzeko produktuak prestatu eta film gardenez estalita giro tenperaturan utzi.
  3. Biharamun goizean, azken orearen osagai guztiak nahastu. Papila lodi samarra da. Egurrezko goilare edo rasketa hartu eta pare bat jira eta bira eman. Oratu, oratu ez da oratzen, nahastu baizik.
  4. Labarako paperez estalitako bi molde prestatzen ditugu eta ahi ( papila) horrez betetzen ditugu. Esku-azpiak busti eta molde barruan leuntzen goaz. Behar adina aldiz busti eskuak.
  5. Tenperatura  epelean hartzidurak bizpahiru (2-3) ordu irauten du. Legami freskua gehituz gero, Dieterrek dioenez, hartzidura honek 20 bat minutu irauten ditu; beraz, adi!  Argazkian,  bi ogiak  hartziduraren 2 ordu igaro ondoren.
  6. Labea 250 º tara berotu. Ez dugu jarriko ez lurrinik ezta haizegailurik ere. Labean 250º tan edukiko dugu lehenbiziko 10 minutuak eta ondoren, 60 minutu osatu arte  210º tan
  7. Hozten utzi. Zekale ogi hauek, egun batzuk utzi behar dira hortzak ezarri aurretik. Horrela bere zapore guztia ateratzen dute eta gozoagoak dira. Argazkia ateratzerakoan ogiak ez du hartu behar adinako denbora… Horregatik goma-antzekoa dirudi.

ON EGIN!!!

10 Iruzkin

Tebak idatzia atalean

Cruasának

Aupa guztioi!
Gaur cruasának dakarzkizuet! Errezeta pausoz pauso jartzen dizuet errezago ikusteko. Ez da batere zaila, baina bai neketsua. 
 
Egiteko 3 ordu t´erdi behar dira , gutxi gora behera . Oreak atsedenaldiak hartzen dituen bitartean beste ekitaldi batzuei ekin diezaiokegu.
 
Osagaiak

  • 500 g galirin (Frantzian T55 izeneko irina erabiltzen dute; hemen 125 g indar galirina eta 375 g ogia egiteko galirin nahas daiteke). Nik, “Rincón del Segura” galirin zuria erabili nuen.
  • 270 g ur
  • 20 g legami freskoa (ez nuenez, 9 g legami lehor erabili nituen)
  • 85 g azukre
  • 10 g gatz
  • 250 g gurina (gantz kopurua% 82 izan dadila; supermerkatuan erraz lortzen da, ia gurin guztiek halako ehunekoa baitute) Nahiz eta gantzaren ehunekoa adierazi ez, nik “Las Nieves” izeneko gurina erabili nuen, oso ona baita.

Egiteko era

  • Gurina izan ezik, beste osagai guztiak bol baten nahastu. Eskuz, era tradizionalean  oratu 5 minutu, besterik ez. Orea oso leuna geratzen ez bazaigu lasai, ez arduratu.
  • Orea bolean sartu eta plastikozko filmaz estalita, toki epelean ordubete bat utziko dugu.
  • Gurina hozkailutik atara eta azaleran jarri. Arrabolez, kolpeka bigunduko dugu. Plastikozko filmaren gainean jarri eta 15×15 zentimetroko laukia sortu. Arrabolaz laundu.
  • Irin pittin bat bota azalera eta orea boletik atara. Arrabolaz 30×30 zentimetroko (gutxi gora behera) laukia egingo dugu. Orea azaleran ez itsastea oso garrantzitsua da . Behar izanez gero galirin gehiago bota.
  • Gurina, erronboa bezala ore gainean ipini.
  • Gutun-azala balitz bezala, ore puntak barrura sartu. Presioa eginez, ertzak ondo itxi.
  • Arrabolaz, gora eta behera zabaldu, alboetara ez. Noizean behin orea aztertu itsatsi ez dadin eta behar izanez gero irin pittin bat bota, arrabolari ere. GARRANTZITSUA: Gurina eta orea arrabolaz zabaltzen dugunean, geruzak sortzen ari gara. Gurina hotza dagoenez ez da sartuko orean. Gurina, orearekin nahastu barik doala ohartuko gara. Kontuz ibili!orea zabal ez dadin gurina ateratzen utziz.
  • Orea hiru zatitan tolestuko dugu. Heren bat, goitik erdira eta beste bat behetik erdira, eskutitza balitz bezala. Plastikozko filmaz bildu eta hozkailuan 30 minutuz sartu.
  • Orea hozkailutik atara. Orain bi tolesdura jarraian egingo ditugu. Ertzak (tolesdurak ikusten diren alboak) gora eta behera begira jarriko ditugu eta orea arrabolaz zabalduko dugu. Lehen egin dugun moduan, orea eskutitza balitz bezala tolestuko dugu . Orea giratu ertzeak gora eta behera begira egon daitezen eta berriro zabaldu. Oraingoan alboetara ere zabal dezakegu. Eskutitza bezala tolestu, plastikozko filmaz bildu eta berriz ere 30 minutuz hozkailura sartuko dugu.
  • Hozkailutik atara eta azaleran irina bota . Zabaldu ezazu 60×40 zentimetroko laukizuzena izan arte. Orea erditik luzetara moztu.
  • Orain triangeluak moztu. Espatularen luzeera erabilgarria da triangelu guztiak berdinak izateko.
  • Triangeluaren oinarrian ebagitxo bat egin.
  • Orea borobilduz, cruásan forma eman.
  • Gorringo eta gatz pittin bat nahastu. Nahasketa honekin cruasának margotu. Harrotzen utzi haunditu arte. Nik, ordubete t’erdi utzi nituen.
  • Labea, aurretik 200 gradutara berotuta izan. Cruasának berriro margotu. 12-15 minutu inguru labekatu.

Et voilá le croissant!

HAUSNARKETA egin nahi nuke. Cruasának oso gozoak egonda ere, ez ziren harrotu nik espero nuen beste. Ez dakit galirinak indar falta zuelako edo legamiagatik izan ote zen; edota bi arrazoiengatik. Batek daki! Nire dastatzaile maitatuenek izugarri gustatu zaiela esan didate. Dena den berriro ere, cruasán hauek egiten saiatuko naiz igandeko gosarirako oso egokiak baitira.

Animatu, neketsua badirudi ere, ez da oso zaila. Erlojua eskuetan izan behar da, baina merezi du.

Muxu bat denontzat.

Los que quieran leer esta entrada en castellano pueden hacerlo en el siguiente enlace:
http://lachicadelasrecetas.blogspot.com/2010/02/croissants-de-mantequilla.html

Un saludo a todos

16 Iruzkin

Tebak idatzia atalean

Hokkaidoko esne ogia

Aupa guztioi!!

Gaur, Ibanek tailer baten emandako errezeta gozo hau dakarkizuet. Hokkaido, Japoniako bigarren irla haundiena da. Interneten bilatu dut eta, Hokkaidoko esnekiak oso famatuak omen dira. Hokkaido irlan, bertako behiek, belardi ezin hobeak eta freskoak jaten dituzte, eta noski, esnekiak primerakoak dira. Ogi hau, okin amateurrentzat ez da batere zaila. Oratzea, tradizional erara egiten da.

OSAGAIAK:

  • Ogia egiteko irina, 400 gramo
  • Esnegaina, 75 gramo
  • Azukrea, 55 gramo
  • Gatza, 7 gramo
  • Esnea, 155 gramo
  • Arrautza ertain 1 (ez da haundia izan behar)
  • Legami freskoa, 12 gramo (edo 3-4 gramo legami lehorra)

EGITEKO ERA:

  1. Osagai guztiak bol baten ondo nahastu (egurrezko koilara lagungarria izaten da). Gero, boletik atara eta 10-15 minutu oratu tradizional erara. Hasieran zaila badirudi ere, pittin bat praktikatuz gero, ikusiko duzue orea leuntzen hasten dela. Hasieran, orea itsaskorra da baina, gero eta suabeago bihurtzen da. Pazientzia izan
  2. Sartu berriro olioz igurtzitako bolean (bol-a garbitu eta gero), estali plastikozko filmarekin. Utzi ezazue 60-90 minutu giro epelean, lehenengo hartzidura egiteko.
  3. Atara orea, gasgabetu kolpe batzuk beldur barik emanez. Orain, oreari forma ematen zaio. Demagun, 25 zentimetroko moldeko ogia aukeratu dugula. Orduan lauki forma eman arrabolaz (luzera 25 zentimetrokoa) eta biribildu. Moldea olioz igurtzi eta ore biribildua barrura sartu. Beste 60-90 minutu giro epelean utziko dugu bigarren hartzidura egiteko.                                                                                                                             Oharra.- Kasu honetan hor goian azaltzen diren  osagaien kantitateak bikoiztu egin nituen aluminiozko hiru molde (18,5 x 5,5 x 7,5 zm.) bete behar nituelako. Moldea 25 zentimetro izanez gero, goian azaltzen diren kantitate hoiek erabili baina, bolatxoak 180 gramokoak izan beharko lirateke.
  4. Aukera bat txokolatezale zaretenontzat: laukia zabaldu eta gero, txokolatezko krema (Nocilla edo Nutella izenekoak) zabaldu ertzeetara iritsi barik. Orduan orea biribildu eta moldean sartu. Beheko irudietan: Nik hiru moldeko ogi prestatu behar izan nituen. Nere lagunentzat ziren eta itxura berezia izatea nahi nuen. Orduantxe zera egin nuen; molde bakoitzean 4 biribiltxo sartu nituen. 12o gramoko lau bolatxo prestatu, luzatu, txokolatezko kremaz igurtzi eta borobildu. Gero, soberan zegoen bolatxoa erabiliz, euren izenen lehenengo hizkia formatu eta gainean ipini nien: P eta C; ematen du PC opila baina ez da ;))
  5. Labea berotu 180º gradutan. Moldeko ogia sartu eta labekatu 45 minutu gutxi gora behera. Denbora, orearen tamainuaren arabera doa. Molde txikiagoek denbora gitxiago beharko lukete.  Ez erretzeko, (nire labean gertatzen den moduan) ogia sartu eta 15 minutura aluminiozko paperarekin estali. Urrengo argazkian emaitza ikus dezakezue.

Atara labetik, hotzitu eta on egin dizuela!

14 Iruzkin

Tebak idatzia atalean