Artxiboa laburpen hitzeka: ogia

Olozko ogia – Haferbrot

Azpalditik olo ogia masa madrearekin egiteko grina neukan. Oloa gustokoa dut, zaporea suabe izateaz gain zuntza disolbagarria ere duelako (irin integrala edo kopoak janda, batez ere), eta gaur egungo elikaduran zuntza kantitate gutxi jaten dela kontutan izanda, idorreria sor ez dadin oso lagungarria izan daitekelako.

Astelehenean bertan hasten naiz pentsatzen asteburuan zein ogi egingo dudan, eta errituala bihurtu da. Lehenengo zerealak aukeratu, eta astean zehar nire liburuetan eta weborrialdetan begiratzen dut ea gustoko errezeta topatzen dudan. Pasa den astean ia astirik gabe geratu nintzen, ostirala iritsita, gustoko errezetarik ez bainuen aukeratua. Xabik Alemaniatik ekarritako olo aleak erabiliko nituela erabakita neukan, baina gustoko ogi errezeta aurkitzea ez nuen lortzen. Bai liburuetan bai weborrialdeetan, errezeta gehienak nire ustez, olo kopo edota irin integral gutxi zeuzkaten. Goxoak ziruditen pare bat aurkitu nituen, Gastronomía y Cía eta “mis recetas favoritas”-eko loturak uzten dizkizuet, masa madre ez izan edota erabili nahi ezean edonork olo ogia egiteko aukera izan dezan.

Ostiralean 22:00tan, ondino ez nekien zein ogi egingo nuen, baina jadanik badaezpada, zekale ama orea martxan neukan.

Azkenean olo ogia (Haferbrot, alemanieraz) aurkitu nuen. Olo irinaren ordez kopoak zeuzkan, baina halan da guztiz “ogia horixe zela” erabaki nuen. Pare bat aldaketa, irina eta ama orea erabili ahal izateko eta listo!!. Hona, errezeta dakarkizuet.



OSAGAIAK (740 gramoko hiru ogi egiteko)

  • 216 g zekale ama orea: 3 g zekale ama orea (aktibatua), 120 g zekale integrala eta 96 g ur (beherago, zelan egiten den idatzi dizuet).
  • De http://www.alnature.de
  • 530 g “olo irin beratze”: 250 g olo irin integrala (edo olo kopoak) eta 280 g ur beroa (2-4 ordu lehenago prestatua).
  • 800 g galirin zuria (Rincón del Segura)
  • 80 g zekale irin integrala
  • 22 g gatza
  • 10 g azukrea
  • 10 g landare margarina
  • 525 g ura (gutxi gora behera, gitxiago ala gehiago izan daiteke)
  • (Aukerako) 15 g irin malteatua (J. Renobell -Bartzelona- dendatik ekarritakoa)
  • (Aukerako) Ogia egiteko, Alemaniatik ekarritako espezia nahasketa (Brot Gewürz Alnatura markakoa). Osagaiak: Txarpoila (Kümmel), mihilua (Fenchel), martorria (Koriander) eta anis-belarra (Anis).

Izaskunek, espezia nahasketa errezeta hau eskuratu zidan. Hementxe duzue:

2 goilakarada martorri haziak
1          ”       txarpoil
1 goilakaradatxo anisa
1          ”            kuminoa
1          ”            mihilua
Osagai guztiak birrindu eta pote baten gorde gure zekale ogiei botatzeko.


EGITEKO MODUA
  1. 12-15 ordu lehenago zekale ama orea prestatu egin behar da. Bezperatik zekale ama orea aktibatua izango dugu eta honetatik 3 gramo besterik ez ditugu hartuko. Ura botako diogu, ondo nahastu eta segituan zekale irin integrala, berriro nahastu. Nik normalean arratsaldeko 7tan prestatzen dut hurrengo goizean 11ak aldera ogia egiteko.
  2. 2-4 ordu lehenago “olo irin beratze” hori prestatzen da. Bol baten olo irin integrala ipiniko dugu eta kolpe batean ur bero-beroa botako diogu. Egurrezko goilara batekin ondo irabiatu. Plastikoaz estali eta esan bezala, 2-4 ordu beratzen utziko dugu.
  3. Ogia egiten den egunean, bol haundi baten osagai guztiak, ura izan ezik, jarriko ditugu. Ura pixkanaka pixkanaka gehituko diegu. Eskua orean sartzea gomendatzen dizuet, orea hatzamarrekin marruskatuz.  Orea itzaskorra eta irristakorra da, ia kontrolaezina. Behin nahastuta, bol-a estalita, 30 minutuko atsedenaldia hartzen utziko dugu.
  4. Orea azalera atera eta frantses teknika erabiliz (oso itsaskorra denez tradizional erara zaila delako), 10-15 minutu oratuko dugu.
  5. Bol-a olioaz igurtzi eta orea barruan sartu 3 orduko lehenengo hartzidura egin dezan. Olioz igurtzitako azaleran, ordubetero tolesdura bat emanez.
  6. Azken tolesdura egin eta gero, irin pittin bat botako dugu azaleran eta horren gainean 15 minutu inguru orea deskantsatzen utziko dugu. 740 gramoko hiru zatitan banandu, boleatu eta azkenik, erabiliko ditugun moldeetako forma eman (borobila ala luzea).
  7. (Aukerako) orea trapu busti batetik pasatu, hezetu eta haziak gainetik bota.
  8. Banetoietan edota olioz igurtzitako metalezko moldeetan sartu eta bigarren hartzidura egin dezatela, beste pare bat ordu utziko ditugu.
  9. Laba berotu 240ºtara. Lurrina prestatuko dugu labaren barruan (harrira eta metalezko ontzira ur beroa jaurtikiz)
  10. Ogiari ebakiak egin eta laban sartu. 5 minutu pasa eta gero tenperatura 220ºtara jaitsi. Labekatzeko denbora: 50 minutu.

ON EGIN DEZAZUELA!!

Advertisements

6 Iruzkin

Tebak idatzia atalean

Eguneroko ogiaren errezeta hobetua

Aitor (nire bikotea) da azkenaldian gure etxeko okin berria, eta gaurko errezeta bere esperimentu bat da, eta oso emaitz oneko esperimentua gainera. Kriston goxoa geratu zen, eta mamia normalean baino suabeagoa (nik uste esnearengatik) zegoen. Berak etxean dugun ogi-makinan oratu zuen, baina eskuz berdin-berdin egin daiteke, metodo tradizionalarekin oratuz. Nik ogi-makinari ikusten diodan abantaila nagusiena, orea tenperatura egokian mantentzen duela da, eta lehen fermentazioa egiteko oso ondo etortzen zaio ogiari.

Osagaiak:

  • 240g ur
  • 90g esne (laktosa gabea gure kasuan)
  • 220g burbuiladun ama ore
  • 555g irin:
    • 355g gari irin zuri
    • 100g erdi-osoko zekale irin
    • 100g erdi-osoko gari irin
  • 3g gatz
  • 3g soja lezitina
  • 5g sesamo hazi
  • 3g mitxoleta hazi
  • 1,5g azahar-ur
  • 3g oliba olio

Osagai guztiak nahastu, ondo oratu eta 2,5 orduz utzi olioz bustirik ontzi batean igotzen tenperatura epelean. Ondoren, boleatu eta nahi duzuen itxura eman (gure kasuan pixka bat luzexka) eta bannetoiean utzi beste ordu t´erdiz. Nahi izanez gero, hozgailuaren laguntzaz bigarren fermentazio hau luzatu daiteke.

Labea 250ºC-tara berotu, eta guztiz beroa dagoenean, ura duen ontzi bat sartu (lurruna egiteko) eta ogiaren gainazala moztu ondoren, labera sartu eta 5 minuturo lurruna bota labe barrura 25 minutuz. Ondoren, labearen tenperatura 220ºC-tara jeitsi eta beste 35 minutu inguruz egin ura duen ontzia labetik atera ondoren. Labetik ateratzerakoan ondo hozten utzi jan aurretik.

OHARRA: Errezeta hau gazteleraz hemen topatu dezakezue.

NOTA: Podéis ver esta receta en castellano aquí.

9 Iruzkin

Olaiak idatzia atalean

Sagarrezko neguko ogia – Dan Leparden “winter apple loaf”

Bai,
Badakit!

Neguko ogia dela eta udan gaudela. Baietz.

Baina, egoeragatik errezeta hau eta ez besterik bilatu behar izan dut. Xabierren errua da, berak Ingalaterratik ekarritako irina oparitu zidalako. Irin honek oso izen luzea eta berezia du: “Organic stoneground malted blend flour” “Bacheldre Watermill markakoa” eta britainiarra da. Euskarara itzulita “harrizko errotan birrinduriko irin malteatu ekologikoa” eta olé. Horregatik, liburutegi haundia den internetera abiatu naiz irin berezi hau erabiltzen duen errezeta baten bila. Jatorrizko errezeta esteka honetan.

OSAGAIAK

  • Sagar txikia (golden motakoa alegia)
  • Tipula txikia
  • 75 ml. garagardo edo sagardo (errezeta britainiarra izanda, ez dut uste gure sagardo garratzaren antzekorik erabiliko dutenik. Eurek, Erresuma Batuan “El Gaitero” sagardoaren antzekoa edaten baitute)
  • Jatorrizko errezetan 100 ml. ur erabiltzen dituzte baina nik ez nituen behar izan. Lehenengo saiakeran ogi hau egin nuenean ur kopuru guztia batera bota nion. Hasiberriaren akatsa da. Ez dugu ur kopuru guztia batera botako, pixkanaka-pixkanaka baizik, orearen hezetasunaren arabera.
  • 200 g. ama orea (100 g. ur + 100 g. galirin zuria)
  • 75 g. ekilore haziak
  • 75 g. kuia (kalabaza) haziak
  • 250 g. irin malteatua. Irin berezia da,  Xabierrek oparitutakoa. Esteka honetan, Dan Lepardek irin berezi honen ordez zer erabil daiteken aipatzen du: 150 g. galirin zuria, 100g. galirin osokoa, 3  koilarakada olo-kopo (edo gari-kopo, garagar-kopo) erreak eta koilarakada bat hurrengo hiru aukera hauetatik: malta-estraktua (líkidoa edo lehortua); xirope iluna (erremolatxazkoa alegia) edota melaza.
  • 175 g. galirin zuria (Rincón del Segura alegia)
  • 10 g. gatz
  • Oratzeko, oliba olioa

ZELAN EGITEN DEN

  1. Bol baten sagarra azalarekin birrindua ipini (haziak kenduta). Tipula gordinik txiki-txiki zatituta bota. Garagardoa (edo sagardoa), ama orea, haziak, irinak eta gatza gehitu. Azkenik eta BEHAR IZANEZ GERO, ura pixkanaka-pixkanaka gehitu. Ez egin, nik lehenengo saiakeran egin nuen moduan. Ez ahaztu ere, tipula eta sagarrak ura botatzen dutela. Oso ondo nahastu eta 30 minutu egonean laga. Orea biguna izan arren arazo haundirik gabe oratu daiteke. Bola forma eman eta olioztatutako bol baten utzi. Film gardenaz edo zapiaz estali.
  2. Hartzidura egiteko sukaldean bi ordu eta erdi utzi dut (gaur, 25º C inguru zeunden). 40-45 minututik minutura tolesdura eman diot.
  3. Hirugarren tolesdura ondoren orea, oratzeko azaleran lasai-lasai 5 minutu utziko dugu. Geroago, forma eman. Orea oso itsaskorra denez, saskian edo banetoian irina emankortasunez bota eta bertan sartu. Estali, eta ordu eta erdi inguru utziko dugu.
  4. Laba 220º-tara berotu.
  5. Orea atara eta laban sartu baino lehen ebagiak egingo dizkiogu. Labako beheko partean ura bota (nik jada ez dut ontzirik ipintzen, zuzenean botatzen diot lurrina egiteko). 220º-tara 20 minutuz labekatu ondoren, 180º-tara jeitsi eta beste 20 minutu eduki. Oso huzain ederra botatzen du.

Egun bat pasa ondoren dastatu dugu eta izugarrizko zaporea du. Izokina ketan, hegaluze ketan, gazta ketan dastatuak izan ditut baina, ogia ketan inoiz dastatu barik neukan!!!  Izokina ketan, ogi honen gainean, ahaztezinezko esperientzia da.

Sarrera hau, Xabierri eta Juantxori eskeini nahi diet. Xabierri Alemaniatik errekadutxoak ekarri baitizkidalako eta Juantxori bere pazientziagatik, Aitzorrotz-etik jeisterakoan farregura eman zidan eta bera izan zen nere txantxetako “biktima”. Mila esker bioi  bihotz-bihotzez.

4 Iruzkin

Tebak idatzia atalean

Zekale (%100) ogi mingotsa

Aspaldi nahi nuen zekalearekin ogi bat egitea, nahastu barik, guztiz zekalezkoa, eta gaurkoa Dan Lepard-en “the art of handmade bread” liburutik atera dut. Bertan, Eskandinavian okin baloratua den Jan Hedh-ek zekalea nola manipulatu erakutsi ziola dino.

Ia irakiten dagoen ura irin pixkatekin nahasturik, zekaleari, malgutasuna ematen diola eta uraren tenperaturaren arabera emaitza desberdinak lortuko ditugula esaten digu. Nahasketa horri, gelatina deitzen dio.

Gelatina egiteko osagaiak:

  • Ura 90ºC-tara 240gr.
  • Zekale irina 60gr. -kasu honetan, erdi integrala-

Orea egiteko osagaiak:

  • Zekale ama orea 200gr., 21ºC-tara.
  • Ura 50gr., 19ºC-tara.
  • Gelatina 300gr.
  • Iragazitako zekale irin fina 300gr. -kasu honetan 200gr. integralak eta 100gr. zuriak-
  • Gatza 6gr.

Gelatina egiteko. Irina bol batera atera, ura irakiten jarri eta 90ºC hartzen dituenean irinarekin nahastu. Ondo irabiatu. Nahasketa pikortsua ez izatea lortu behar dugu, ados? Bol-a estali. Giro-tenperaturan ordu bete eta hogeitalau ordu artean utziko dugu, horrela, zekalea gelatinizatzea lortuko dugu eta horrek mamiari nolabaiteko malgutasuna emango dio.

Honekin batera zekale ama orea berpizten hasiko gara.

Dakizuenez, nik, ama orea hiru bider elikatzen dut. Berpiztu orduko 18 ordu pasatu ziren, bai? Ba, gelatina ere, denbora bera egon zen estalita, ados?

Orea egiteko. Bol baten irina eta gatza nahastu. Beste baten, ura eta ama orea jarri eta ondo irabiatu.

Gelatina dagoen bol-etik bi koilarakada gorde, gero, ogiari gainetik emateko.

Ura eta ama orearekin egindako nahasketa gelatina dagoen bol-era bota, ondo nahastu eta irina eta gatza dauden bol-era pasatu. Ondo nahasi.

Mahai gaina olioztatu, orea bertara atera eta gozo gozo oratu. Boleatu eta laga.

Bannetoi bat irineztatu, oreari forma eman eta bertara sartu. 5 orduko hartzidura hartzen lagako dugu edo, ia bikoiztu arte.

Labea 210ºC-tara berotzen ipini. Orea, landare-paperakin estalita dagoen erretilu batera atera eta gelatinarekin margotu. Urarekin zipriztindu, labean sartu eta bost minutu pasa ondoren, berriz zipriztindu. 50 minututan egina dago. Parrila baten gainean, laga hozten.

Hotzitu ondoren, landare paperarekin estali eta 24 ordutan laga horrela.

Uff!!! Hau urduritasuna, eta hortik zer aterako da?

Paketea zabaldu etaaa … tatxannnnnnnn!!!

Hemen duzue atera zena.

Pisu dexente zeukan eta mozten hasi nuenean totxoa zela iruditu zitzaidan, bainaaaa keeeba, malgua da!!, eta kontutan izanda duen irin guztia zekalea dela, oso malgua dela esango nuke. Goxoa redio!!! Zekalea gustokoa baduzue egin, ez zarete damutuko eta. Kalera irten, lagunekin elkartu eta 30 minututan janda zegoen. Ahoan lagatzen duen zaporea, ez dauka izenik …. sinestezina!!!

Oharra.- Ogi hau, laister, errepikatzeko asmoa dut neurri batzuk aldatuz. Esango dizuet.

On egin!!!

Muxu bat

12 Iruzkin

Juantxok idatzia atalean

Laranja ogia

Etxean hainbat zitriko zuhaitz ditut, hiru laranjondo eta bi limoiondo. Ikarragarri gustatzen zaizkit zitrikoak, eta azken bi urteetan uzta oparoa izan dudanez, errezeta ezberdinak probatzen aritu naiz berauekin.

Zuhaitz bat da denetan bereziena, duela 15-20 urte, jandako laranja baten hazia, lehioko lorontzian sartu, eta handik atera zen. Oso txikia zen haseran, gogoan dut bi hosto soilik zituela, baina denborarekin, hazten joan zen, eta badira urte batzuk atarian landatu genuela. Urte askotan ez zuen fruiturik eman, antzua izango zela uste nuen, hazi txar batetik atera nuelako edo, baina duela laupabost urte, fruituak ematen hasi zen, eta orain, laranja pillo bat ematen digu. Laranja urtsuak eta benetan gozoak dira, erositakoen inbidia zipitzik gabekoak.

Duela gutxi, ogiaren foroan http://www.elforodelpan.com/ Gizaburuagan tahona bat bisitatzeko proposamena egin zen, eta hau aipatuz, Juantxok idatzitako email batean, beraiek egiten duten laranja ogia aipatu zuen. Txikitan egiten nituen froga-zerrikeriak gogorarazi zizkidan aipamen honek,,, eta aspaldi egindako, edo hobeto esanda, egiten saiatutako, laranja ogi bat egitea pentsatu nuen. Hainbat froga egin nituen, interneten bilatutako errezeta ezberdinak kontuan hartuta, baina ez nuen esne ogi edo antzekorik nahi, ogi ogia nahi nuen.

Beraz, modurik sinpleenera jo nuen, ogi baten oinarrizko errezeta hartu, eta moldatu, honako hauek dira osagaiak;

.- 500gr galirin zuri

.- 175gr laranja zuku

.- 100gr ura

.- 200gr ama orea

.- 12gr gatza

.- 2-3 laranjen azala arraspatuta

Irina, gatza, ama orea eta laranja azalak nahastu, eta ondoren laranja ura eta ura gehitu. Ore bateratua lortzean, ondo oratu, leundu arte. Tolesdurak egin, eta olioztaturiko ontzi batean leku epelean utzi, hiru orduz, ordubetez behin berriro tolestuz. Denbora hau pasata, oreari nahi den forma edo itxura eman, eta bannetoian utzi, leku epelean berriro, ordu eta erdi inguruz. Labea piztu, 225º tara, eta ontzi batean ura jarri bertan, lurruna sortu dezan. Orea laberatzean, labearen pareteta ura lainoztu. Hogei minutuz mantendu, eta denbora hau pasatzean, ura atera, eta labearen tenperatura 200º-ra jeitsi, eta beste 20-30 minutuz utzi. Labetik atera, eta parrilla baten gainean utzi hozten.

Ogia laberatzean etxe osoan zabaltzen den usaina lurrinik onena da. Ogi xigortu moduan, gurin pixkatekin gosaltzeko ezinhobea!

7 Iruzkin

Iduk idatzia atalean

Arto eta ekilore hazidun ogia

“El folló”  landetxeko bideoa ikusten sortu zen ogi honen ideia.  Iban Yarza aurreratu zuenez, landetxe hori izango da , datorren uztailean “ogiaren 2. festaren”  gunea
Bideoa ikustean, bukaera antzean, ogi batzuk aurkezten dituzte eta beraien artean, arto eta pipadun ogia aipatu zuten. Tate! Pipak eta artoa!  Eta, nire haurtzaroko asteburuak etorri zitzaizkidan burura eta arto erreak “pepes” jaten genituen eta pipak ere bai, noizbehinka. Zapore nahasketak ona izan behar du, pentsatu nuen, eta arto-ogiaren errezeta bila abiatu nintzen.  Liburuetan begiratu nuen, Interneten… Ez nuen %100 ase ninduen bat bera ere aurkitu, eta gainera, ogia  ama oreaz egitea nahi nuen. Beraz, inprobisatzeari eman nion.

OSAGAIAK, ia kiloko ogi bi egiteko.

  • Arto irin ekologikoa 380gr.
  • Ogia egiteko galirin ekologikoa (Rincón del Segura) 570gr.
  • Galirin zuriaren ama orea 400gr.
  • Gatza 20gr.
  • Ekilore pipak gezak eta gordinik 160gr.
  • Ura 700gr. gutxi gora behera (arto-irinak ur asko xurrupatzen baitu)

ELABORAZIOA

  1. Arto-irina beratzea: ogia egiten hasi baino ordu bete aurretik, bol baten, 600 g irakindako ura arto-irinari ezartzen diogu.Ondo nahasi eta  estalita egonean uzten dugu.
  2. Beste bol baten, ogia egiteko galirina eta gatza pisatu eta ongi nahasten  ditugu.   Ama orea gehitu eta beste 100 bat g. ura. Nahastu. Ez da irin guztia bat egingo.
  3. Arto irin beratua gehitu. Ongi nahasi.  Orain bai, irin guztiak bat egingo duela.  Ore bigun eta heze bat geratzen da.
  4. Oratzeko, frantziar oraketa erabiliko dugu, pazientzia handiz, lasai eta emeki oratuz. Denboratxoa eramango digu ore fin eta leun bat lortu arte. Pazientzia eta musika atsegina.
  5. Gehiena oratuta dugunean,  apur bat lautu eta pipa guztiak gainetik ezartzen dizkiogu, orea itxi eta oratzen jarraitzen dugu beste tartetxo bat.
  6. Orea bitan zatitu, olioz igurtzitako bi boletan sartu eta toki epel batean uzten dugu 3 bat ordu, orduro tolesdura bat emanez oreari. Tolesdurak, olioztatutako sukalde gainan eman eman nizkien.
  7. Hirugarren  tolestearen ondoren, oreei forma eman eta saskitxoetan edo banetoietan sartuko dugu
  8. Bigarren fermentazio bat egin dezan ordu eta erdi bat uzten dugu.
  9. Labea berotu 220ºtara eta lurruna izan dezan prestatzen dugu: labearen behekaldean matalezko ontzi bat, mikroondasen ura berotzen eta lurruntzeko spray  bat.
  10. Banetoietatik,  labarako paper batera ateratzen ditugu oreak eta taxuak gauzatzen dizkiogu. Laban sartu. Metalezko  ontzian ur irakina botatzen dugu eta sprayaz labaren hormak lurrintzen ditugu. 60 minutu, 220º labekatu. Hozten uzten dugu.

Hona hemen emaitza:  arto-irina bezalako gluten gabeko irin mordoxka izan arren,  pilo bat igo diren ogiak, Rincón de Segurako irina indar  irin bezala kontsideratzen ez den arren.

Gaur, lan saio batera eraman dut ogi bat eta apur bat astuna dela azaldu didate, ogi mamia trinkoa delako baina, oso gozoa dela. Hona hemen ogi mamiaren argazki bat.

On egin!!!

4 Iruzkin

Tebak idatzia atalean

Malta ogi baltza – Malzbrot

Ogiaren foroaren kortesiaz eskainitako errezeta. Foro kide batek ogi beltz alemana nola egin zitekeen galdetzen zuen eta Dieterrek 4 errezeta idatzi zituen nahi duen orok jaso ditzan.
Hauxe da lauetatik lehenbizikoa: hasi berrientzat maltazko ogi beltza. Pazientzia apur bat eta egiteko pare bat egun badituzue zotina kentzeko adinako ogia da.

Ogi honek,  dietetika edota ekologi produktuen dendetan aurki daitezkeen osagai batzuk behar ditu: malta edaria (argazkian “Power Malt”) eta malta siropea  (xarabea) (Malto di orzo”).  Malta edaria oso- oso  gozoa da eta siropea, are gehiago.
OSAGAIAK  kiloko 2 ogi egiteko

Zekale ama orea. 15-20 ordu aurretik prestatu eta 28º C tan utzi.

  • 70  g zekale ama orea aktiboa (abiapuntu).
  • 250 g zekale irin latz / oso integrala. TMX, sukaldeko errobota edo ehogailuan zekale alea birrinduz lor dezakezue.
  • 100 g  zekale irin integrala.
  • 350 g ura.

Quellstück (aldez aurreko  beratzea). Bezpera gauean nahastu:

  • 550 g zekale irin latz / oso integrala.
  • 100 g gari irin integrala.
  • 300 g malta edaria (Vitamalt, Pony, e.a).  “Eroski”  bezalako dendetan erosgai…
  • 270 g ura.
  • 50 g maltazko siropea ( xarabea)

NegritaAzken orea:

  • aldez aurretiko beratzea.
  • 700 g zekale ama orea.
  • 20 g gatza.
  • 10 g  azukrea.
  • Aukeran:  15 g legami freskoa.

LANKETA:

  1. Abiatzeko zekale ama orea prest izan behar da.  Ama orea prestatu, 15-20 ordu 28º tan edo leku epel baten utzi. Nirea 19 ordu egon da.
  2. Bezpera gauean aldez aurretik beratzeko produktuak prestatu eta film gardenez estalita giro tenperaturan utzi.
  3. Biharamun goizean, azken orearen osagai guztiak nahastu. Papila lodi samarra da. Egurrezko goilare edo rasketa hartu eta pare bat jira eta bira eman. Oratu, oratu ez da oratzen, nahastu baizik.
  4. Labarako paperez estalitako bi molde prestatzen ditugu eta ahi ( papila) horrez betetzen ditugu. Esku-azpiak busti eta molde barruan leuntzen goaz. Behar adina aldiz busti eskuak.
  5. Tenperatura  epelean hartzidurak bizpahiru (2-3) ordu irauten du. Legami freskua gehituz gero, Dieterrek dioenez, hartzidura honek 20 bat minutu irauten ditu; beraz, adi!  Argazkian,  bi ogiak  hartziduraren 2 ordu igaro ondoren.
  6. Labea 250 º tara berotu. Ez dugu jarriko ez lurrinik ezta haizegailurik ere. Labean 250º tan edukiko dugu lehenbiziko 10 minutuak eta ondoren, 60 minutu osatu arte  210º tan
  7. Hozten utzi. Zekale ogi hauek, egun batzuk utzi behar dira hortzak ezarri aurretik. Horrela bere zapore guztia ateratzen dute eta gozoagoak dira. Argazkia ateratzerakoan ogiak ez du hartu behar adinako denbora… Horregatik goma-antzekoa dirudi.

ON EGIN!!!

10 Iruzkin

Tebak idatzia atalean